ଚୁଆପାଣିକୁ ଭରଷା କରୁଛନ୍ତି କୋଡ଼ିଗନ୍ଧି ଗାଁ ଲୋକେ, ନାଳରେ ବଡ଼ଗଣ୍ଡି ପକାଇ ପାଣି ଆଣୁଛନ୍ତି ମହିଳା

ଚିତ୍ରକୋଣ୍ଡା: ମାଲକାନଗିରି ଜିଲା ଚିତ୍ରକୋଣ୍ଡା ସ୍ୱାଭିମାନ ଅଞ୍ଚଳ ଅଣ୍ଡିରାପାଲି ପଞ୍ଚାୟତ ଅନ୍ତର୍ଭୁକ୍ତ କୋଡ଼ିଗନ୍ଧି ଗାଁରେ ପ୍ରାୟ ୧୨୦ ଗୋଟି  ଆସିବାସୀ ପରିବାର ବସବାସ କରନ୍ତି। ପିଇବା ପାଣି ପାଇଁ ଗାଁର ୫୦୦ରୁ ଅଧିକ ଲୋକ ନାଳ ପାଣି ଓ ଚୁଆ ପାଣି ଉପରେ ନିର୍ଭରଶୀଳ। କିଛି ବର୍ଷ ତଳେ ଉକ୍ତ ଗ୍ରାମରେ ଗୋଟିଏ କୂଅ ଓ ଗୋଟିଏ ନଳକୂଅ କରାଯାଇଥିଲା। କିନ୍ତୁ ବର୍ତ୍ତମାନ ନଳକୂଅଟି ଅଚଳ ହୋଇ ଯାଇଥିବା ବେଳେ କୂଅଟି ପୋତି ହୋଇ ଯାଇଛି। ଫଳରେ କୋଡ଼ିଗନ୍ଧି ଗ୍ରାମର ଲୋକେ ଆଗଭଳି ଯେମିତି ନାଳ ପାଣି ଓ ଚୁଆପାଣି ଉପରେ ନିର୍ଭରଶୀଳ ଥିଲେ ଏବେବି ସେଇ ସମାନ ଅବସ୍ଥା ଦେଇ ଜୀବନ ବିତାଉଛନ୍ତି।

ଚୁଆପାଣି କୋଡ଼ିଗନ୍ଧି ଗାଁ ଲୋକଙ୍କର ଭରଷା ପାଲଟିଛି। ଖରା ଦିନ ଓ ଶୀତ ଦିନର କିଛି ମାସ ନାଳ ପାଣି ଉପରେ ନିର୍ଭର କରିଥାନ୍ତି। ବର୍ଷା ଦିନେ ଅଧିକ ଗୋଳି ପାଣି ସକାଶେ ପାଣି ବ୍ୟବହାର ଉପଯୋଗୀ ହୋଇ ନଥାଏ, ଏଣେ ନଳ କୂଅ ଅଚଳ, ଏଣୁ ପ୍ରତିଦିନ ଗାଁ ର ମହିଳାମାନେ ଗାଁ ଠାରୁ  ଅଧ କିଲୋମିଟର ଦୂରରେ ଥିବା ନାଳ ଉପରେ ପଡ଼ିଥିବା କାଠଗଣ୍ଡି ଡେଇଁ ଚୁଆରୁ ପାଣି ଆଣିଥାନ୍ତି। ଏହି ଚୁଆ ଓ ନାଳର ଅପରିଷ୍କାର ପାଣି ପିଇ ବହୁ ସମୟରେ ଗାଁ ଲୋକେ ତରଳଝାଡା ଓ ପେଟ ରୋଗରେ ଆକ୍ରାନ୍ତ ହେଉଥିବା ଗାଁ ଲୋକେ ଅଭିଯୋଗ କରିଛନ୍ତି।

ସେଇଭଳି ସେଇ ଗୋଟିଏ ପଞ୍ଚାୟତର  ତେନ୍ତୁଳିପଦର ଗାଁ ଅବସ୍ଥା ସମାନ ପ୍ରକାରର। ଗୋଟିଏ କିଲୋମିଟର ଦେଇ ଚୁଆ ଓ ଜଳ ଭଣ୍ଡାରର ପାଣି ପିଇଥାନ୍ତି ଉକ୍ତ ଗ୍ରାମବାସୀମାନେ। ଅବିଳମ୍ବେ ଜିଲା ପ୍ରଶାସନ ଉଭୟ ଗ୍ରାମର ଜଳ ସମସ୍ୟାକୁ ଅନୁଧ୍ୟାନ କରି ପାନୀୟ ଜଳ ବ୍ୟବସ୍ଥା ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି।

The post ଚୁଆପାଣିକୁ ଭରଷା କରୁଛନ୍ତି କୋଡ଼ିଗନ୍ଧି ଗାଁ ଲୋକେ, ନାଳରେ ବଡ଼ଗଣ୍ଡି ପକାଇ ପାଣି ଆଣୁଛନ୍ତି ମହିଳା first appeared on Sambad.